[custom_frame_left][/custom_frame_left] Во последно време најмногу се пишува и се зборува за важноста на заштитата во лето од штетните сончеви зраци за да се спречи настанувањето на несаканите последици од претераното изложување на сонце.
Заштитните кремови повеќе не служат само за заштита од изгореници, туку и од предвремено стареење на кожата и од настанување на рак на кожа.
Дерматолозите ви донесуваат одговори на честите прашања за кремовите за заштита од сонце.
Кога истекол рокот на траење на кремот за заштита од сонце?
Некои кремови имаат означено рок на траење на амбалажата, додека некои – не. Исто така, одредени кремови имаат подолг рок на траење, некои пократок, а сѐ зависи од формулата на кремот. Кремовите што содржат разни хемикалии, со текот на времето стануваат помалку ефикасни, а физичките блокатори (цинк или титан) можат да потраат и до три години. Доколку на својот крем не можете да пронајдете дата на истекување на рокот, најсигурно би било по една година да го фрлите.
Дали кремовите во спреј се делотворни?
Кремовите во спреј, односно лосионите штитат еднакво добро како и обичните кремови во друга амбалажа. Единствена разлика е во нанесувањето. Имено, кремот во спреј мора на кожата да го нанесете во поголемо количество. Нанесете го така што ќе можете да го видите слојот на кремот на кожата. Дури и ако е проѕирен, ќе забележите влажна трага. Овој препарат се нанесува дури откако ќе ставите доволен слој обичен крем на кожата.
Како повторно да нанесете крем ако сте нашминкани?
За адекватна заштита од сонце, кремот треба да го нанесувате на секои два часа, дури и кога сте нашминкани. Во текот на летните месеци нанесувајте козметика која веќе има заштитен фактор. На тој начин ќе го заштитите лицето од негативното дејство на сонцето. Пожелно е, сепак, да го нанесувате кремот за заштита од сонце на чисто, ненашминкано лице, за да се избегнат евентуалните иритации и алергии. И најквалитетната шминка понекогаш содржи одредени видови хемикалии, кои во комбинација со друг препарат на кожата можат да предизвикаат несакани нус-појави.
[custom_frame_center][/custom_frame_center]
Превземено: www.plusinfo.mk
Датум на објавата: 07.08.2012