Состојбите на македонската и на светските берзи се тема на редовниот неделен берзански преглед низ кој ве води Христијан Стојчевски.
Како тргна берзата во слободен пад, да помисли човек дека следната фаза е бесплатно продавање на акциите.
Добредојдовте во редовната неделна анализа на тргувањето со хартии од вредност.
Да видиме зошто вкупниот раст забележан од почетокот на годинава е избришан и зошто цените повторно се доближуваат до најниското ниво годинава.
За волја на вистината, и случувањата на странските пазари на капитал не одеа во полза на македонскиот, но тоа воопшто не треба да е оправдување за негативниот тренд што преовадува на берзата веќе седма недела по ред. Деновиве вредноста на компаниите мерена преку МБИ 10 е намалена за 10 проценти од максималната вредност во 2012-тата. Ликвидноста на тргувањето и понатаму е на очајно ниско ниво што предизвикува високи ценовни осцилации во текот на тргувањето и дополнително го прави пазарот неатрактивен. Моменталните цени на акциите веќе го имаат вкалкулирано намалувањето на стапката на економски раст на земјава, па сепак интересот за инвестирање и понатаму е незначителен. Еве детален преглед.
МБИ 10 заврши на 1.947 индексни поени, што е намалување за безмалку 1%.
Вкупниот промет достигна 22 милиони денари без блок трансакциите и јавните понуди т.е. 13% помалку од минатата недела.
Акциите на Алкалоид беа најтргувани со промет од 5,5 милиони денари.
А најголем добитник беше Тутунски комбинат од Прилеп, со раст од 67%.
Најмногу паднаа акците на Метропол.
Навистина во овој период е многу тешко да се предвиди до кога ќе трае ваквата депресивна состојба, но јасно е дека токму ваквите моменти се вистинска можност за инвестирање кое што на долг рок ќе ги даде посакуваните ефекти, и од очекуваните дивиденди, и од капиталните добивки.
До следната берзанска анализа на Алфа и КБ Публикум Инвест, идниот петок, ве потсетувам дека најголем ризик е да не се ризикува!
httpv://www.youtube.com/watch?v=Iy-NOZc7Dxo
Превземено: Алфа
Датум на објавата: 20.04.2012
Термин: 19.00 часот
Автор: Христијан Стојчевски